今日都好累, 但又過得幾開心。番工有好多野笑, 同有好多野講。好似今日有單case, 本來一定唔會接納, 但係原來好耐之前16號錯批過, 搞到個Agent執住呢樣野黎challenge我地, 搞到Madam幾嬲。不過見到16號個無耐搞笑樣, 大家都嬲佢唔落~ 呢輪因為工作調配, 成日都要搵19號, 以前好怕19號, 佢都幾惡, 又粗魯。但同佢做開野, 又覺得佢幾搞笑, 幾得意, 雖然係成日講粗口, 但都係一個傻仔。

夜晚, 同媽咪去酒樓食飯, 遇到林保怡坐響隔離檯。婷婷係咁話要同佢影相, 但又唔敢行過去。直到埋單, 我咪陪佢一齊叫佢影相, 點知成間酒樓d人都望住我地, 林保怡話如果佢同地影的話, 個個都走埋黎架啦, 佢叫我地響酒樓出面等佢, 佢走出黎同我地影, 都算nice咯! 而最開心既應該係媽咪, 佢響韓國見到佢都影唔到相, 今日終於都影到喇~

由於Iris今日放假, 所以番工做唔停, 今日仲要有好多麻煩case添, 好累! 諗住放工即刻番屋企休息。點知杜生突然話約食飯, 我見成幾個月無見過佢地, 幾累都去見下佢地啦~

出到去先知Elaine姐同溫小姐都黎, 都幾好喎, 我都有成年無見過Elaine啦, 估唔到一見就用個咁疲憊既樣黎會佢, 真係有d失禮。無計啦, 前幾晚都係趕Project~ 希望下次見佢用個靚d既樣~

做左成年Project, 今日終於大家都有野睇。上星期個Demo衰到貼地之後, 真係多謝阿sir月尾俾我地Demo多一次, 咁我地先至"的"起心肝做野。但我地成team人真係要人逼, 只係一個星期, 我地就已經做左六至七成野啦, 人地真係做足成年架嘛~ 我地都真係勁!

Tracy響台灣送俾我既植物蛋, 種左兩個星期, 見過佢發芽之後, 今日終於被裁定種死了, 我亦不忍心咁掉牠入垃圾桶。Tracy多謝你, 但又對唔住你, 我無好好咁栽培佢.......

今日Winnie send番d 婚紗相俾我, 睇過之後心情都好番d啦~

今日上日文堂時, 唔知點解好開心。 無錯! 呢個係真感覺, 而今日上堂亦教左「唔知點解」呢句文型, 真係得意。今日上堂, 我少有地講左好多意見, 唔怕錯, 咩都答。而我地班又用日文教Sensei講地道廣東話, Sensei仲話我地教佢時講既日文好左好多, 叫我地平時用多d日文教佢喎~

呢輪唔知咩事, 成日皮膚敏感, 上星期係對手, 今個星期到塊面, 點算呀? 又要睇醫生? 岩岩先食完d藥咋~!